शहीद अप्पासाहेब काटे स्मृतिस्थळ — भूमिपूजन सोहळा संपन्न

कुंभेज (ता. करमाळा) येथे शहीद जवान अप्पासाहेब काटे यांच्या स्मृतिस्थळाचे भूमिपूजन नुकतेच मोठ्या उत्साहात पार पडले. या सोहळ्यात दिगंबररावजी बागल माध्यमिक विद्यालय, कुंभेज या संस्थेने महत्त्वपूर्ण भूमिका बजावली असून, स्मारकासाठी शाळेच्या वतीने जागा उपलब्ध करून देण्यात आली आहे.

या प्रसंगी ॲड. बालासाहेब मुटके यांनी प्रतिपादन केले की, "शहिदांची स्मृती जपणे ही प्रत्येक नागरिकाची नैतिक जबाबदारी आहे." कुंभेज ग्रामस्थ, सैनिक संघटना, शाळेचे मुख्याध्यापक हनुमंत पाटील सर, सामाजिक कार्यकर्ते व अनेक मान्यवर या सोहळ्यास उपस्थित होते.

दिगंबररावजी बागल माध्यमिक विद्यालय, ता. करमाळा, जि. सोलापूर या शाळेने गावाप्रती असलेली सामाजिक बांधिलकी पुन्हा एकदा सिद्ध केली. शाळेच्या जागेवर भव्य स्मारक उभारण्यात येणार असून, हे स्मारक येणाऱ्या पिढ्यांसाठी देशप्रेम व राष्ट्रनिष्ठेचे प्रतीक ठरेल. सैनिक कल्याण मंडळाच्या माध्यमातून लवकरच बांधकाम सुरू होईल असे सूत्रांनी सांगितले. सूत्रसंचालन कल्याणराव साळुंखे यांनी केले.